Jamie Carragher iyo Micah Richards oo saadaalin Cajiib ah Ka sameeyey kooxaha ku guuleysan kara Champions League

Daafacyadii hore ee kooxaha Liverpool iyo Manchester City ee Jamie Carragher iyo Micah Richards ayaa saadaaliyay kooxaha ku guuleysan kara Champions League xilli ciyaareedkan.Champions League ayaa xalay dib usoo laabtay kaddib bilooyin uu maqnaa, lugta hore ee wareega 16-ka ayay Bayern Munich iyo AC Milan guulo 1-0 ah ka gaadheen PSG iyo Tottenham.Real Madrid oo Koobka difaacanaysa sidoo kale Bayern, PSG, Chelsea iyo Liverpool ayaa kamida kooxaha loo arkayo kuwa ugu cad cad.Carragher iyo Richards oo xalay inay saadaal sameeyaan la weydiiyay ayuu ugu horreynba Richards u saadaaliyay kooxda qaabka aadka u fiican ku jirta ee Napoli oo 15 dhibcood ku hoggaaminaysa horyaalka Serie A.

Carragher ayaa isaguna sidoo kale sheegay inuu xusayo Napoli balse uu qabo inay ugu dambayn noqon karto sanadkii ay Man City hanan lahayd koobkaas.Micah Richards ayaa yidhi “Waxaan filayaa Napoli, Napoli oo qaab ciyaareedkeeda ku jirtaa waxay ahayd mid cajiib ah”

“Dhinaca kooxda ugu cad cad marka laga eego, way adagtahay kaliya waxaad ka fikiraysaa dhammaadka xilli ciyaareedka, kooxuhu way fiicnaanayaan balse markay qaab ciyaareed noqoto waa Napoli”.

Carragher ayaa isaguna yidhi “Haa, waxaan filayaa in Napoli haatan tahay kooxda qaabka wacan ku jirta, waan jeclaan lahaa inaan arko iyagoo ku guuleysanaya, waa koox ka baxsan kuwa waaweyn ee aad isleedahay way ku guuleysanayaan balse waxaan isleeyahay wuxuu noqon karaa xilli ciyaareedkii Manchester City”.