Jamaahiirta Liverpool oo gegida Anfield ku sharfay xiddigaha waaweyn ee kooxda Real Madrid ka Tirsan

Jamaahiirta Liverpool ayaa gegida Anfield ku sharfay xiddigaha waaweyn ee kooxda Real Madrid oo markale ka adkaatay kuna xaaqday kulankii ka dhacay xalay gobolka Merseyside.Real Madrid ayaa lugta hore ee wareega 16-ka Champions League 5-2 ku dubatay Liverpool iyadoo intaas ugu dartay Finaladii Champions League ee ay sanadihii ugu dambeeyay kasoo qaaday.Labada xiddig ee ay maamuuseen taageerayaasha Reds ayaa ah labada ruug-caddaa ee Karim Benzema iyo Luka Modric kuwaas oo ay sacab sharafeed u tumeen markii bedelka lagu sameeyay qaybtii dambe.

Labada halyeey ee kusoo guuleystay Ballon d’Or ayaa qaab ciyaareedyadoodii ugu sarreeyay kusoo muujiyay kulankii xalay ay hoggaanka 2-0 ka ah kasoo laabteen.

Kaddib markii ay laba gool kaga dhaliyeen 14-kii daqiiqo ee ugu horreeyay kulanka, taageerayaasha Liverpool ayaa qabay dareenka ah inay ugu dambayn aarsanayaan oo aysan xiddigaha Los Blancos la tacaali karin jawiga culus ee Anfield.

Vinicius Jr ayaa degdeg ugu sara-kacay Madrid isagoo labada gool isla qaybtii horeba kasoo guday kahor inta aysan Eder Militao iyo Karim Benzema oo laba gool dhaliyay qaybtii dambe guusha keenin.