Bayaan ay xalay soo saareen ayey ku sheegeen in ay "aad uga welwelsan yihiin" saameynta dadka rayidka ah kasoo gaareysa isku dhacyadan socday muddada.
"Waxaan si weyn uga walaacsan nahay hoobiyeyaasha lagu garaaco dhismeyaasha rayidka, taasoo horseeday in waxyeello ay soo gaarto dadka shacabka ah iyo barakac baahsan".
Sidoo kale bayaanka kasoo baxay Beesha Caalamka ayaa lagu yiri "waa in si deg deg ah loo joojiyaa weerarada".Hadalkan ayaa yimid xilli dagaalka ka socda magaalada Laascaanood uu galay maalintii tobonaad, iyadoo labada dhinac uu mid walba ku eedeynayo inuu weerarka billaabay.
Shaqaalaha gurmadka degdegga ah ayaa BBC-da u sheegay in dad badan uu dagaalka kasoo gaaray khasaare isugu jira dhimasho iyo dhaawac ayna adag tahay in si buuxda loo fuliyo howlaha gurmadka.
Tan iyo xalay waxaa magaalada Laascaanood laga maqlayay dhawaqa rasaasta iyo madaafiicda. Dad goobjoogeyaal ah ayaa BBC-da u sheegay in xalay magaalada ay ku soo dhaceen madaafiic iyadoo la maqli karay rasaas ay iswaydaarsanayeen dhinacyada dagaallamaya.
Baaq Xabbad joojin
Bayaanka ay xalay soo saareen hoggaanka howlgalka Midowga Afrika ee nabad ilaalinta u jooga Soomaaliya iyo dalal ay ka mid yihiin kuwa dariska la ah Soomaaliya, Mareykanka, Britain, Turkiga, Sucuudiga, Midowga Yurub, Urur-Goboleedka (IGAD) iyo Qaramada Midoobay ayaa ku boorinaya dhammaan dhinacyada inay u hoggaansamaan xabbad joojinta oo ay is xakameeyaan, isla markaana ay galaan wada hadal wax ku ool ah si loo gaaro xal nabadeed.Beesha Caalamka ayaa ku celiyay baaqoodii ahaa in gargaarka bani'aadanimo aan la hor istaagin si deg deg wax looga qabto baahiyaha dadka barakacay ka dib saameynta ka dhalatay rabshadaha socda.
XIGASHADA SAWIRKA,SOCIAL MEDIA
Mas'uuliyiinta Somaliland ayaa dhawaan ku dhawaaqay xabbad joojin, inkastoo taasi aysan sababin inuu istaago dagaalkaIlaa hadda ma jiraan warar rasmi ah oo xaqiijinaya tirada dhimashada iyo dhaawaca uu sababay dagaalka Laascaanood iyo tirada dadka ilaa hadda ku barakacay.
Xaaladda jirta ayaan saamaxeynin in weriyeyaashu ay gudaha u galaan magaalada.
'Al-Shabaab waxay ka faa'iideysaneysaa dagaalka Laascaanood'
Taliska militeriga Jamhuuriyadda iskeed ugu dhawaaqday madaxbannaanida ee Somaliland ayaa shalay shaaciyay in xooggaga Laasacaanood ay kula dagaallamayaan ay ku jiraan qaar ka tirsan ururka Al-Shabaab.
Hogaanka hawlgalinta milatariga Somaliland, Cabdiraxmaan Cabdillahi Xasan (Cabdi Dheere) oo ka hadlay xaaladda magaaladda Laascaanood ayaa Al-Shabaab ku eedeeyay inay ka faa'ideysanayaan dagaalka Laascaanood.Waxaa xaqiiq ah oo aan haynaa inay Al-Shabaab dumiso guryaha Laascaanood iyadoo mar walaba dooneysa in aanay nabad ka aslaaxin Laascaanood arrintaa waxaan u xaiqijineynaa dadka waxgaradka ah ee reer Laascaanood inay ogaadaan in cidda guryahooda dumineysa ee aan oggoleyn in dagaalka uu soo afjarmo ee aan nabadda dooneyn ay tahay Al-Shabaab si ay uga faa'ideystaan fursadda ah shaqaaqada maanta ka taagan Laascaanood," ayuu yiri Cabdi Dheere.
XIGASHADA SAWIRKA,TELEFISHANKA QARANKA SOMALILAND
Hasayeeshee eeddaas Somaliland waxaa waxba kama jiraan ku tilmaamay, afhayeenka guddiga 33-da xubnood ee aayo-katashiga SSC, Cabdirisaaq Maxamed Xasan (Falaalug). Wuxuu BBC-da u sheegay in dadka deegaanka uun ay la dagaallamayaan ciidammada Somaliland.Eedeyntaas waa mid aan waxbo ka jirin waa af ay u barteen inay iska yiraahdaan oo ay ku baneystaan dadka dhiiggiisa, naftiisa iyo maalkiisa, dadka ma aha Al-Shabaab ah shaqana kuma leh, argagaxisana ma aha waa dad shicib ah oo 15 sana dulmi lagu hayay markii dambana loo bareeray xabad iyo dil lagula kacay weeye".
Waa markii labaad oo dhowr maalmood gudahood ay saraakiisha Somaliland sheegeen in dagaalka Laacaanood ay qeyb ka yihiin Al-Shabaab.
War kasoo baxay Al-Shabaab oo ay baahiyeen warbaahinta taageerta kooxdaas ayaa lagu sheegay in iyagu aysan "wax lug ah ku lahayn dagaalka Laacaanood".
Eedahaas ay hawada isu marinayaan labada dhinac ayaa sii socda xilli lasoo tebiyay in tobannaan kun oo qof oo ka qaxay colaadda toban maalin jirsatay ay u baahan yihiin caawinaad, halka baaqyada xabbad joojintana aanay jirin cid dhag jalaq u siinaysa
0 Comments